យោងតាមទំព័រហ្វេសប៊ុកផ្លូវការរបស់អាជ្ញាធរអប្សរា ផ្សាយកាលពីព្រឹកថ្ងៃទី១១ មីនា ២០១៩ នេះ បានឲ្យដឹងថា អគ្គនាយកនៃអាជ្ញាធរជាតិអប្សរា បានអនុញ្ញាតឱ្យប្រតិភូចិនដឹកនាំដោយលោក ឈូ មីង (CHOU Ming) អនុប្រធានពិព័រណ៍សិល្ប:ចិន នៃរដ្ឋបាលបេតិកភណ្ឌវប្បធម៌ជាតិចិន ចូលជួប ដើម្បីពិភាក្សា ពីការស្នើខ្ចីរូបបដិមាខ្មែរ ដើម្បីយកទៅចូលរួមតាំងពិព័រណ៍អរិយធម៌អាស៊ីនៅប្រទេសចិន។
រូបបដិមាដែលចិនស្នើខ្ចីទៅនោះមានបីប្រភេទ ជាបដិមាមិនមានទំហំធំនោះទេ ហើយបដិមាទាំងនោះមានប្រភពនៅប្រាសាទតាកែវ និងប្រាសាទចៅសាយទេវតា។ នេះបើតាមការបញ្ជាក់របស់លោក ឡុង កុសល អ្នកនាំពាក្យអាជ្ញាធរអប្សរា។ លោកបានបញ្ជាក់ប្រាប់បន្ថែមទៀតថា ភាគីចិនក៏បានអញ្ជើញមន្ត្រីប្រតិភូកម្ពុជា ដើម្បីចូលរួមពិព័រណ៍ផងដែរ។
ឆ្លើយតបទៅនឹងសំណើនេះ ភាគីអាជ្ញាធរជាតិអប្សរាមិនទាន់អាចឆ្លើយតបភ្លាមៗបាននៅឡើយទេ ដោយហេតុថា រាល់រូបបដិមា ដែលបានស្នើឡើងចាំបាច់ត្រូវធ្វើការវាយតម្លៃធានារ៉ាប់រងស្របតាមការគ្រប់គ្រងបុរាណវត្ថុ ដើម្បីធានាបាននូវសុវត្ថិភាព។ ម្យ៉ាងវិញទៀត អាជ្ញាធរជាតិអប្សរាត្រូវការពេលវេលា ក្នុងការផ្ដល់ព័ត៌មានទៅស្ថាប័នពាក់ព័ន្ធ ដើម្បីអាចអនុញ្ញាតឲ្យយកបដិមាចេញពីទីតាំងជាក់ស្ដែង។
អ្នកនាំពាក្យដដែលលើកឡើងថា ចិនមានបំណងបង្ហាញពីកិច្ចសហប្រតិបត្តិការយ៉ាងល្អវាងប្រទេសទាំងពីរតាំងពីការអភិវឌ្ឍន៍ និងវប្បធម៌ ដែលមានអាយុកាលយូរយារណាស់មកហើយ។ ហើយនេះក៏ជាឱកាសដែលប្រទេសកម្ពុជាអាចបង្ហាញអារ្យធម៌ខ្មែរទៅកាន់បណ្ដាប្រទេសនៅអាស៊ី និងជុំវិញពិភពលោកឱ្យបានស្គាល់ខ្មែរកាន់តែច្បាស់ថែមទៀត។
គួរបញ្ជាក់ផងដែរថា ប្រាសាទតាកែវ និងប្រាសាទចៅសាយទេវតា សុទ្ធតែស្ថិតក្រោមគម្រោងជួសជុលកែលម្អរបស់ក្រុមអ្នកជំនាញចិន។ បើតាមលោកឡុង កុសលចិនក៏គ្រោងសិក្សាស្រាវជ្រាវលើគម្រោងកែលម្អ និងជួសជុលប្រសាទផ្សេងទៀតមានប្រាសាទព្រះវិហារជាដើម។ ពិព័រណ៍អរិយធម៌អាស៊ីដែលនឹងរៀបចំធ្វើឡើងនៅខែឧសភា ឆ្នាំ២០១៩ នៅប្រទេសចិន។
ប្រភព៖ Sabay
