ភ្នំពេញ៖ ឆ្លងកាតនូវបទពិសោធជាច្រើនធ្លាប់ជាអ្នករែកបន្លែលក់ និងបុគ្គលិកអនាម័យតាមសណ្ឋាគារ រួមទាំងមានអាជីពច្រើនមុខទៀតលោក ឈួន សុខលីម បែរជាមកបង្កើតផលិតកម្មថ្មីដើម្បីផលិតបទចម្រៀងតែងនិពន្ធថ្មី និង ចម្រៀងជាមរតកដើមច្រៀងឡើងវិញ ដែលជាការងារខ្លួនស្រលាញ់ និងផ្ដល់ឱកាសឲ្យអ្នកមានសម្លេងល្អអាចមានរស្មីដ៏រុងរឿងរះត្រចះត្រចង់លើវិថីសិល្បៈ។
ម្ចាស់ផលិតកម្មមរតកមេឌា លោក ឈួន សុខលីម បានថ្លែងប្រាប់ពីមូលហេតុ ដែលធ្វើឲ្យលោកសម្រេចចិត្តធ្វើអាជីវកម្មនេះថា៖ «ពីមុនយើងមិនសម្បូរទីផ្សារសិល្បៈច្រើនដូចសម័យឥឡូវនេះទេ។ កាលដែលខ្ញុំមកបង្កើតផលិតកម្មនេះឡើងគឺដើម្បីជួយលើកស្ទួយវិស័យសិល្បៈយើងកាន់តែរីកចម្រើនជាងមុន មានគេទទួលស្គាល់តារាស្រុកយើងឲ្យបានកាន់តែច្រើន»។
លោកថា៖ «សម្រាប់ខ្ញុំការប្រកួតប្រជែងកាន់តែច្រើននៅក្នុងវិស័យនេះកាន់តែសប្បាយចិត្ត ព្រោះវាមិនមែនជារឿងអាក្រក់នោះទេ គឺវាកាន់តែជំរុញសិល្បៈឲ្យកាន់តែទូលំទូលាយ និងចង់ឲ្យតារាដែលមានសំលេងល្អគាត់មានទីផ្សារការងារច្រើន»។
ចំពោះតារាចម្រៀងក្នុងផលិតកម្ម មរតក មេឌា សុទ្ធសឹងតែជាបេក្ខជនបេក្ខនារី ដែលធ្លាប់ចូលរួមក្នុងការប្រលងប្រជែងក្នុងកម្មវិធីលំដាប់ពិភពលោកដូចជា The Voice Cambodia, Cambodian Idol និងមានកម្មវិធីផ្សេងៗទៀតដូចជាកញ្ញា ដានីកា លោក សាម សុភ័ស លោក ខេម អ៊ីសាក់ លោក នាង ប្រាក់សុគន្ធ និងលោក ចិត ចាន់ធឿន ព្រមទាំងមានតារាផ្សេងទៀតសរុបចំនួន ១៣ នាក់ ឯណោះ។
ម្ចាស់ផលិតកម្ម មរតក មេឌា ដែលធ្លាប់ធ្វើជាអ្នកលក់ឥវ៉ាន់ចាប់ហួយ មុខរោងចក្រស្បែកជើងនៅម្ដុំទឹកថ្លា បានប្រាប់ពីហេតុផល ដែលជ្រើសយកតារាចម្រៀងដែលធ្លាប់ប្រលងប្រជែងក្នុងកម្មវិធីប្រឡងចម្រៀងថា៖ «ដូចដឹងស្រាប់ហើយថា ទោះបីជាសម្លេងល្អប៉ុណ្ណាក៏ដោយ បើសិនជាមិនមានការជ្រោមជ្រែងពីផលិតកម្ម ឬក៏មិនមានចេញបទចម្រៀងថ្មីៗ ប្រាកដណាស់ត្រឹមមួយឆ្នាំហ្នឹង ពិតជាមហាជនភ្លេចសម្លេងរបស់គាត់ជាមិនខាន។ អ៊ីចឹងហើយបងគ្រាន់តែចង់ឲ្យអ្នក ដែលគាត់មានសម្លេងល្អ មានទីផ្សារក្នុងការងារសិល្បៈឡើងវិញ និងចង់ផ្តល់ឱកាសឲ្យគាត់។ បើសិនជាមានផលិតកម្មធំៗណា ដែលគាត់ពេញចិត្តនឹងសមត្ថភាពរបស់ពួកគាត់ហើយចង់ឲ្យគាត់ចូលផលិតកម្មផ្សេង ដែលល្បីនោះគឺបងសប្បាយចិត្តហើយ»។
ចំណែកបទចម្រៀង ដែលត្រៀមចេញក្នុងពិធីបុណ្យចូលឆ្នាំប្រពៃណីជាតិខាងមុខនេះ ផលិតកម្ម មរតក មេឌា ក៏បានត្រៀមចម្រៀងស្វាគមន៍ឆ្នាំថ្មីចំនួនជាង ៨០ បទដែរ ប៉ុន្តែមិនមែនត្រឹមតែបទសពិធីបុណ្យចូលឆ្នាំប៉ុណ្ណោះនោះទេ ក៏មានបទលាយគ្នាបែបសប្បាយៗ និងការចងចាំមិត្តភាពល្អៗក្រោយបញ្ចប់ពិធីបុណ្យជាតិខ្មែរយើង ដើម្បីទៅប្រកបមុខរបររកស៊ី ឬធ្វើការងារផ្សេងៗបន្តទៀតដូចគ្នា៕ Piseth – Baykdang
