ក្រសួងសុខាភិបាលបាល បានក្រើនរំលឹកពលរដ្ឋអោយបង្កើតការយកចិត្តទុកដាក់ខ្ពស់ ខណៈដែលនៅដើមឆ្នាំ២០១៩នេះ ករណីជំងឺគ្រុនឈាម មានការកើនឡើងគួរអោយកត់សម្គាល់ ស្របគ្នានឹងរបាយការណ៍ពីពលរដ្ឋ អះអាងថា មូស ក៏មានការកើតឡើងច្រើនផងដែរ ។
យោងតាមសេចក្តីជូនដំណឹងរបស់ក្រសួងសុខាភិបាល បានអោយដឹងថា ករណីជំងឺគ្រុនឈាមនៅទូទាំងប្រទេស ក្នុងដើមឆ្នាំ២០១៩នេះ មានការកើនឡើងច្រើនជាងឆ្នាំ២០១៨កន្លងទៅ បើប្រៀបធៀបទៅនឹងរយៈពេលដូចគ្នា។ ក្រសួង បានបញ្ជាក់ថា កត្តាមួយក្នុងចំណោមកត្តាជាច្រើនដែលបង្កឱ្យមានជំងឺគ្រុនឈាមនោះ គឺបម្រែបម្រួលអាកាសធាតុ និងវត្តមានជម្រកមូសខ្លា នៅតាមផ្ទះសម្បែង ឬ ទីធ្លាសាធារណៈ។
ដើម្បីការពារ និងទប់ស្កាត់ការផ្ទុះឡើងនូវជំងឺគ្រុនឈាមក្នុងឆ្នាំ ២០១៩ នេះ ក្រសួងបានណែនាំវិធានការ ៣ ដូចខាងក្រោម ៖
វិធានការទី ១ ៖ ត្រូវកំចាត់ដង្កូវទឹកនៅតាមកន្លែងទឹកដក ឬ វត្ថុសម្រាប់ដាក់ទឹក ដូចជាពាងទឹក អាងទឹក ថូផ្កា ចានទ្រជើងតុទូ ក្រឡ ធុង ជាដើម ដោយមានការផ្លាស់ប្ដូរទឹក និងលាងសំអាតរបស់ទាំងនោះ ជាប់ជាប្រចាំយ៉ាងតិចមួយដងក្នុងមួយសប្តាហ៍ ឬ ត្រូវគ្របគំរបឲ្យបានជិតល្អ និងដាក់ថ្នាំអាបែតសម្លាប់ដង្កូវទឹក ឬ ចិញ្ចឹមកូនត្រី ៧ ពណ៌នៅកន្លែងអាចចិញ្ចឹមបាន។ សម្ភារៈដក់ទឹកដែលមិនប្រើ ត្រូវកប់ ឬ ដុត ឬទុកផ្កាប់កុំឲ្យមានដក់ទឹក។
វិធានការទី ២ ៖ អាជីវករ និងម្ចាស់អាជីវកម្មទាំងឡាយដែលប្រកបរបរពាក់ព័ន្ធសម្បកកង់ ត្រូវធ្វើការគ្រប់គ្រងសម្បកកង់ទាំងនោះឲ្យជៀសផុតពីការដក់ទឹក។
វិធានការទី ៣ ៖ ក្នុងករណីមានរោគសញ្ញាក្ដៅខ្លួនខ្លាំងភ្លាមៗជៀសវាងការប្រើប្រាស់ពពួកឱសថអាស្ពីរីន ហើយត្រូវប្រញាប់នាំអ្នកជំងឺទៅរកសេវាពិនិត្យ ដែលនៅជិតបំផុត (មិនឲ្យយឺតជាង ៧២ ម៉ោងបន្ទាប់ពីក្ដៅខ្លួន) ហើយកុំសាកល្បងព្យាបាលអ្នកជំងឺគ្រុនក្ដៅភ្លាមៗដោយខ្លួនឯង ឬពន្យារពេលតាមដានព្យាបាលជំងឺនៅសេវាឯកជនដែលគ្មានជំនាញច្បាស់លាស់ ព្រោះជំងឺគ្រុនឈាមអាចសម្លាប់អ្នកជំងឺបានគ្រប់ពេល។
ក្រៅពីវិធានការទាំង ៣ ខាងលើក្រសួងសុខាភិបាលក៏បានណែនាំឲ្យប្រើប្រាស់ថ្នាំបាញ់មូសជាញឹកញាប់ផងដែរ ដើម្បីកម្ចាត់ចោលមូសគ្រប់ប្រភេទផងដែរ៕
