«បុណ្យទន្លេ» សម្រាប់ឆ្នាំនេះ នឹងរៀបចំនៅខេត្តកំពង់ឆ្នាំង ចាប់ពីថ្ងៃទី១៥-១៧ ខែមីនា

កំពង់ឆ្នាំង)៖ ពិធីបុណ្យទន្លេលើកទី៥ នឹងរៀបចំនៅខេត្តកំពង់ឆ្នាំង ចាប់ពីថ្ងៃទី១៥-១៧ ខែមីនា ឆ្នាំ២០១៩ ក្រោមប្រធានបទ «ទន្លេ៖ ផ្សារភ្ជាប់សន្តិភាព ប្រជាជន និងទេសចរណ៍»។

ក្នុងកិច្ចប្រជុំត្រៀមរៀបចំពិធីបុណ្យទន្លេ នាថ្ងៃទី១០ ខែមករា ឆ្នាំ២០១៩នេះ លោក ថោង ខុន រដ្ឋមន្ត្រីក្រសួងទេសចរណ៍ បានជំរុញឱ្យរដ្ឋបាលខេត្តកំពង់ឆ្នាំង ខិតខំបន្តរៀបចំរបៀបរៀបរយ សណ្តាប់ធ្នាប់ អនាម័យសាធារណៈ ពិសេសក្នុងទីក្រុង និងតាមដងទន្លេឱ្យបានល្អ និងខិតខំចាប់យកឱកាសនៃបុណ្យទន្លេនេះ ពង្រីកការយល់ដឹងសាធារណៈក្នុងកិច្ចការរក្សាការពារបរិស្ថាន ជីវចម្រុះតាមដងទន្លេ និងខិតខំពង្រីកការផ្សព្វផ្សាយពីគោលដៅទេសចរណ៍ឱ្យបានច្រើន។

កិច្ចប្រជុំនេះធ្វើឡើងនៅក្នុងសាលាខេត្តកំពង់ឆ្នាំង ក្រោមអធិបតីភាពលោករដ្ឋមន្ត្រី ថោង ខុន លោក ឈួរ ចាន់ឌឿន អភិបាលខេត្តកំពង់ឆ្នាំង លោកស្រី ដោក សុទ្ធា ប្រធានក្រុមប្រឹក្សាខេត្តកំពង់ឆ្នាំង ព្រមទាំងមានការចូលរួមពីថ្នាក់ដឹកនាំក្រសួងទេសចរណ៍ រដ្ឋបាលខេត្តកំពង់ឆ្នាំង តំណាងមន្ទីរ-អង្គភាពជុំវិញខេត្ត និងមន្ត្រីពាក់ព័ន្ធមួយចំនួនទៀត។

ក្នុងកិច្ចប្រជុំខាងលើ លោករដ្ឋមន្ត្រីបានថ្លែងថា រដ្ឋបាលខេត្ត និងមន្ទីរទេសចរណ៍ មន្ទីរពាក់ពាន់នានាក្នុងខេត្ត ត្រូវខិតខំចាប់យកឱកាសនៃការប្រារព្ធពិធីបុណ្យទន្លេលើកទី៥ ដើម្បីផ្សព្វផ្សាយលើកកម្ពស់ការយល់ដឹងសាធារណៈ អំពីភាពស្អាត និងបៃតង ថែរក្សាបរិស្ថានទន្លេ បរិស្ថានទីក្រុង លើកកម្ពស់គុណភាព ផលិលផល និងសេវាទេសចរណ៍ឱ្យបានល្អ ត្រូវខិតខំស្រាវជ្រាវ និងពង្រីកគោលដៅទេសចរណ៍ថ្មីៗ ឱ្យបានច្រើនសាកសមជាខេត្ត ដែលសម្បូរទៅដោយសក្តានុពលទេសចរណ៍ វប្បធម៌ ប្រវត្តិសាស្ត្រ ធម្មជាតិដ៏សម្បូរបែប ពិសេសទេសភាពតាមដងទន្លេ។

ក្រៅពីនេះ លោករដ្ឋមន្ត្រី ថោង ខុន ក៏បានជំរុញឱ្យមន្ទីរទេសចរណ៍ខិតខំអភិវឌ្ឍន៍រមណីយដ្ឋានទេសចរណ៍ទាំងឡាយណា ដែលមិនទាន់មានការអភិវឌ្ឍ និងត្រូវរៀបចំរមណីយដ្ឋានទេសចរណ៍ផ្សេងទៀត ឱ្យកាន់តែមានភាពទាក់ទាញ ពិសេសត្រូវខិតខំកៀរគររកក្រុមហ៊ុនវិនិយោគលើវិស័យទេសចរណ៍ ដើម្បីបង្កើតផលិតផលទេសចរណ៍ថ្មីៗនៅក្នុងខេត្តបន្ថែមទៀត។

លោករដ្ឋមន្ត្រី ក៏បានជំរុញឱ្យមានការយកចិត្តទុកដាក់ពីការពង្រឹងសន្តិសុខ សណ្ដាប់ធ្នាប់ សេវាម្ហូបអាហារ រមណីយដ្ឋានទេសចរណ៍ បង្គន់អនាម័យសាធារណៈ និងចល័ត បញ្ហាអនាម័យ បញ្ហាសំរាម តាមដងទន្លេ ទីផ្សារ ទីក្រុងស្អាត រមណីយដ្ឋានស្អាត និងត្រូវរៀបចំពិព័រណ៍ម្ហូបអាហារ ពិព័រណ៍ផលិតផលក្នុងស្រុក ព្រមទាំងត្រូវរៀបចំឱ្យបានល្អនូវកម្មវិធីសិល្បៈ ព្រឹត្តិការណ៍កីឡា និងពិធីផ្សេងៗ ពិសេសត្រូវត្រៀមទទួលស្វាគមន៍វត្តមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឱ្យបានល្អ និងហ្មត់ចត់បំផុត៕

ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

ព័ត៌មានទាក់ទង៖

  • ព័ត៌មានថ្មីៗ