កម្ពុជាសម្ពោធដាក់ឲ្យប្រើប្រាស់ទំនប់វារីអគ្គិសនីដែលមានកម្លាំងថាមពលខ្ពស់ជាងគេនៅកម្ពុជាហើយនៅព្រឹកនេះ ដោយថាទំនប់នេះនឹងបង្កើនឯករាជ្យភាព និងសន្តិសុខលើការផ្គត់ផ្គង់អគ្គិសនីកម្ពុជា។
សម្តេចនាយករដ្ឋមន្ត្រី ហ៊ុន សែន នៅព្រឹកនេះបានចូលរួមជាអធិបតីសម្ពោធដាក់ឲ្យដំណើរការជាផ្លូវការនូវទំនប់វារីអគ្គិសនីសេសានក្រោម២ នៅខេត្តស្ទឹងត្រែង។
ទំនប់វារីអគ្គិសនីនេះមានកម្លាំងថាមពល៤០០មេហ្គាវ៉ាត់ ដែលថាជាកម្លាំងថាមពលខ្ពស់ជាងគេក្នុងចំណោមទំនប់វារីអគ្គិនីផ្សេងទៀតនៅកម្ពុជា។ នេះបើតាមសំណេរនៅលើទំព័រហ្វេសប៊ុក សម្តេច ហ៊ុន សែន។
ប្រភពដដែលបន្តថាទំនប់វារីអគ្គិសនីនេះវិនិយោគរួមគ្នារវាងក្រុមហ៊ុន ចំនួនបី រួមមានក្រុមហ៊ុន Hydrolancang International Energy របស់ចិន ដាក់ទុនវិនិយោគ ៥១ភាគរយ ក្រុមហ៊ុន Royal Group របស់ខ្មែរ ដាក់ទុន ៣៩ភាគរយ និងក្រុមហ៊ុន EVNI របស់វៀតណាម ដាក់ទុនវិនិយោគ ១០ភាគរយ។
ប្រភពដដែឡបន្តថាការវិនិយោគនេះតាមរូបភាពសាងសង់-ដំណើរការ-ផ្ទេរ (BOT) មានរយៈពេលសម្បទាន៤៥ឆ្នាំ ដែលក្នុងនោះរយៈពេល៥ឆ្នាំសម្រាប់ដំណើរការសាងសង់ និង៤០ឆ្នាំ សម្រាប់ធ្វើអាជីវកម្ម។
សំណេរខាងលើបន្តថា៖ «ការអភិវឌ្ឍគម្រោងវារីអគ្គិសនីសេសានក្រោម២នេះ ផ្តល់ផលប្រយោជន៍ជាច្រើនជូនប្រទេសជាតិ តាមរយៈការបង្កើតមុខរបរដល់ប្រជាពលរដ្ឋ បង្កើតប្រាក់ចំណូលពន្ធដារជូនរដ្ឋ បង្កើនកម្រិតឯករាជ្យភាព និងសន្តិសុខលើការផ្គត់ផ្គង់អគ្គិសនីកម្ពុជា កាត់បន្ថយហានិភ័យលើកផ្គត់ផ្គង់អគ្គិសនីដែលពឹងផ្អែកលើការនាំចូលឥន្ធនៈដើម្បីផលិតអគ្គិសនី និងបានចូលរួមការអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាជន»៕
ប្រភព៖ Sabay
