ភាពច្របូកច្របល់បានកើតឡើងនៅមុខការិយាល័យធនាគារ Krung Thai Bank និងទូ ATM នៅទូទាំងប្រទេសថៃ ខណៈហ្វូងមនុស្សបានប្រមូលផ្ដុំគ្នា ដើម្បីបើកយកប្រាក់ឧបត្ថម្ភរបស់រដ្ឋាភិបាលឲ្យទាន់ពេលសម្រាប់ថ្ងៃឈប់សម្រាកខាងមុខ។
ស្របពេលដែលការដកលុយពីទូ ATM ជាមធ្យោបាយដ៏ងាយស្រួលមួយ មនុស្សប្រមាណ ១១លាននាក់ផ្សេងទៀត ជាពិសេសអ្នករស់នៅតំបន់ជនបទនៃប្រទេសថៃ ត្រូវមកដកលុយតាមធនាគារ។ ទោះជាយ៉ាងណា ដោយសារតែភាពខ្វះខាតនៃសាខាធនាគារ និងមិនសូវថ្នឹកជាមួយនឹងប្រព័ន្ធនេះផង ជាលទ្ធផលធ្វើឲ្យមានការតម្រង់ជួរវែង ហើយរង់ចាំយូរទៀតផង។
គួរបញ្ជាក់ឲ្យដឹងថា កញ្ចប់ថវិកាចំនួន ៥០០បាត ដែលត្រូវបានគេចាត់ទុកថាជា «អំណោយឆ្នាំថ្មី» ដល់ប្រជាជនថៃមានប្រាក់ចំណូលទាប ដែលកាន់ «ប័ណ្ណក្រីក្រ» នេះ ត្រូវបានបញ្ចូលនៅក្នុងវិធានការមួយដែលបានអនុម័តកាលពីខែមុនដោយគណៈរដ្ឋមន្ត្រី ដើម្បីកែលំអជីវភាពរស់នៅរបស់ពួកគេ៕
ប្រភព៖ Sabay
