ពេជ្រពណ៌ផ្កាឈូកដ៏កម្រមួយគ្រាប់ ត្រូវបានលក់ចេញហើយនៅក្នុងការដាក់ដេញថ្លៃមួយនាទីក្រុង Geneva ប្រទេសស្វីស។
យោងតាមប្រធានទីផ្សារដេញថ្លៃ Christie ឲ្យដឹងថា ពេជ្រពណ៌ផ្កាឈូកដែលមានទំហំ ១៩ការ៉ាត់នេះ ត្រូវបានទេញដោយយីហោគ្រឿងអលង្ការអាមេរិក Harry Winstonក្នុងតម្លៃជាង ៥០លានដុល្លារឯណោះ។ អ្វីដែលអស្ចារ្យនោះ វាបានបំបែកកំណត់ជាពេជ្រដែលលក់បានតម្លៃថ្លៃបំផុតប្រមាណ ២,៦លានដុល្លារក្នុងមួយការ៉ាត់។ ដោយកំណត់ត្រាចាស់ ត្រូវបានកាន់កាប់ដោយពេជ្រទំហំ ៨,៤១ការ៉ាត់មួយគ្រាប់ ដែលលក់បានត្រឹមជាង ១៧លានដុល្លារប៉ុណ្ណោះ (ស្មើនឹង ២,១លានដុល្លារក្នុងមួយការ៉ាត់) កាលពីខែវិច្ឆិកាឆ្នាំ ២០១៧។
គួរឲ្យដឹងថា ពេជ្រនេះ ត្រូវបានរកឃើញនៅប្រទេសអាហ្វ្រិកខាងត្បូងកាលពីជាង ១០០ឆ្នាំមុន ហើយត្រូវបានគេច្នៃក្នុងឆ្នាំ ១៩២០។ លើសពីនេះទៀត វាត្រូវបានគេឲ្យឈ្មោះថាជា “ពេជ្រធំបំផុតមួយក្នុងពិភពលោក” ដែលកម្រមានបំផុត៕
ប្រភព៖ Sabay
