ខណៈដែលចំនួនអ្នកស្លាប់ដោយសារភ្លើងឆេះព្រៃនៅរដ្ឋ California បានកើនឡើង នៅថ្ងៃអាទិត្យម្សិលមិញនេះ ខ្យល់បានបក់បោកខ្លាំង បង្កឲ្យភ្លើងរីករាលដាលកាន់តែធំ។ រហូតមកទល់ពេលនេះ យ៉ាងហោចណាស់មានមនុស្សចំនួន ៣១នាក់បានស្លាប់។
ភ្លើងបានឆាបឆេះ ៣ផ្នែកធំៗ ដោយទី១ គឺ Camp ចំនួន ៤៥០គីឡូម៉ែត្រការ៉េ នៅទូទាំងតំបន់ Northern California ដោយបំផ្លាញផ្ទះសម្បែងចំនួន ៦ ៧០០ខ្នង។ ទី២ និងទី៣ គឺ Woolsey ចំនួន ៣៣០គីឡូម៉ែត្រការ៉េ និង Hill ចំនួន ១៨គីឡូម៉ែត្រការ៉េ។ ទាំង២ផ្នែកចុងក្រោយនេះ បានបំផ្លាញហេដ្ឋារចនាសម្ព័ន្ធចំនួន ១៧៩ខ្នង និង ៥៧ ០០០ខ្នងផ្សេងទៀតកំពុងទទួលរងការគំរាមកំហែង។
គួរបញ្ជាក់ថា មនុស្សជាង ៣សែននាក់ហើយបានបង្ខំចិត្តចាកចេញពីផ្ទះរបស់ខ្លួន នៅទូទាំងរដ្ឋ California។ ភាគច្រើននៃអ្នកទាំងនោះ រស់នៅក្នុងក្រុង Los Angeles County សរុបប្រហែល ១,៧សែននាក់៕
