ភ្នំពេញ ៖ ស្រ្តីម្នាក់ រួមដំណើរជាមួយប្តី និងក្រុមគ្រួសារ រត់ទៅប្តឹងនគរបាលប៉ុស្តិ៍ចោមចៅ១ ខណ្ឌពោធិ៍សែនជ័យ បន្ទាប់ពីចាញ់ល្បិចក្រុមឆបោកតាមទូរស័ព្ទ «លោកអ្នកឈ្នះលុយមហាសាល ១០០០០០ដុល្លារ» ទាមទារឲ្យផ្ញើលុយ ដើម្បីធ្វើបែបបទ សរុបមួយព្រឹកអស់២០០០ដុល្លា រហូតដល់រសៀល បិទទូរស័ព្ទបាត់ បែករឿង ទើបដឹងថាចាញ់បោក ទើបរត់ទៅប្តឹងប៉ូលិស កាលពីវេលាម៉ោង៣ និង១៥នាទីរសៀល ថ្ងៃទី០៦ ខែវិច្ឆិកា ឆ្នាំ២០១៨ នេះ។
ស្រ្តីរងគ្រោះ ឈ្មោះ វុក ណេត អាយុ៣០ឆ្នាំ មុខរបរ កម្មកររោងចក្រ ស្នាក់នៅ ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។ លុយដែលចាញ់បោក អស់២០០០ដុល្លា (ពីរពាន់ដុល្លា)។
តាមការរៀបរាប់ពីស្រ្តីរងគ្រោះបានឲ្យដឹងថា តាំងពីព្រឹកថ្ងៃទី០៦ ខែវិច្ឆិកា នេះមកម្លេះ ជនមិនស្គាល់មុខ បានទូរស័ព្ទមក ប្រាប់ថាលោកអ្នកឈ្នះ រង្វាន់មហាសាល ១០ម៉ឺនដុល្លារ តែតម្រូវឲ្យ គាត់ផ្ញើលុយ ដើម្បីធ្វើបែបបទ ឯកសារ បង្កើតគណនេយ្យ រង់ចាំទទួលរង្វាន់មហិមានេះហើយផ្ញើលុយឲ្យជាបន្តបន្ទាប់ តាំងពីព្រឹកមក សរុបអស់២០០០ដុល្លា ស្រេចទៅហើយ មកដល់រសៀលនេះ ជនអនាមិក ទូរស័ព្ទមកម្តងទៀត ទាមទារឲ្យផ្ញើលុយ៥០០ដុល្លារទៀត តែគាត់អស់លុយ ដើរខ្ចីលុយគេ ពីមួយទៅមួយ ដើម្បីបង្រ្គប់ ទើបបែកធ្លាយរឿង ដឹងថា ជាករណីឆបោក ឆោរឡោ រត់ទៅប្តឹងប៉ូលិស។
កន្លងមកសមត្ថកិច្ចក៏បានផ្សព្វផ្សាយផងដែរជុំវិញករណី រូបភាពឆបោក បែបនេះ ហើយអំពាវនាវដល់បងប្អូនប្រជាពលរដ្ឋ បង្កើនការប្រុងប្រយ័ត្នឲ្យបានខ្ពស់ មិនដែលនៅសុខៗ ឈ្នះរង្វាន់ រាប់ម៉ឺន រាប់សែនដុល្លារនោះទេ កុំចេះតែជឿ សូមគិតនិងពិចារណាមុននឹងសម្រេចចិត្ត៕
ប្រភព៖ ភ្នំពេញ ញូស៍
