ក្រុមហ៊ុនស្រាវជ្រាវ និងអភិវឌ្ឍបច្ចេកវិទ្យាព័ត៌មាន រួមទាំងផ្គត់ផ្គង់សេវាគ្រប់គ្រងតាមប្រព័ន្ធបច្ចេកវិទ្យាព័ត៌មានជាលក្ខណៈខ្នាតតូច និងមធ្យម នឹងត្រូវរដ្ឋាភិបាលកម្ពុជា លើកលែងពន្ធប្រាក់ចំណូល រយៈពេលពី ៣ ទៅ ៥ឆ្នាំ។
អនុក្រឹត្យថ្មីលេខ ១២៤ អនក្រ.បក ចេញដោយរដ្ឋាភិបាល បានឱ្យថា ការលើកលែងពន្ធនេះ ធ្វើឡើងក្នុងគោលបំណង ជួយលើកកម្ពស់ការអភិវឌ្ឍសហគ្រាសធុនតូច និងមធ្យម ដើម្បីបង្កើតការងារ និងបង្កើនសមត្ថភាពផលិតកម្មក្នុងស្រុក ភ្ជាប់ជាមួយនឹងលក្ខខណ្ឌសម្រាប់ផ្តល់ការលើកទឹកចិត្តផ្នែកពន្ធដារ ទៅលើវិស័យអាទិភាពមួយចំនួន។ អនុក្រឹត្យនេះ ត្រូវបានប្រមុខរាជរដ្ឋាភិបាលចុះហត្ថលេខានៅថ្ងៃទី២ ខែតុលា ប៉ុន្មានថ្ងៃមុននេះ។
– សហគ្រាសធុនតូច សំដៅលើសហគ្រាសដែលមានផលរបរប្រចាំឆ្នាំចាប់ពី ២៥០ លានរៀលដល់ ៧០០ លានរៀល ឬ សហគ្រាសដទៃទៀតដែលជាកម្មវត្ថុនៃការចុះបញ្ជីពន្ធដារជាអ្នកជាប់ពន្ធតូច ស្របតាមច្បាប់ និងបទបញ្ញត្តិស្ដីពីពន្ធដារ ឬមាននិយោជិតចាប់ពី ១០ ទៅ ៥០ នាក់។
– សហគ្រាសធុនមធ្យម សំដៅលើសហគ្រាសដែលមានផលរបរប្រចាំឆ្នាំចាប់ពី ៧០០ លានរៀលដល់ ៤ ០០០ លានរៀល ឬ សហគ្រាសដទៃទៀតដែលជាកម្មវត្ថុនៃការចុះបញ្ជីពន្ធដារជាអ្នកជាប់ពន្ធមធ្យម ស្របតាមច្បាប់ និងបទបញ្ញត្តិស្ដីពីពន្ធដារ ឬមាននិយោជិតចាប់ពី ៥១ នាក់ដល់ ១០០ នាក់៕
