PewDiePie ធ្លាប់គ្រងតំណែងជា YouTuber មាន Subscriber ច្រើនបំផុតនាប៉ុន្មានឆ្នាំកន្លងមក បានធ្លាក់មកឈរនៅលេខ ២ បន្ទាប់ពីជើងខ្លាំង T-Series មានប្រភពមកពីប្រទេសឥណ្ឌាទទួលបានតួលេខ Subscriber វ៉ាដាច់ជាផ្លូវការ។
គិតត្រឹមរសៀលថ្ងៃចន្ទនេះ Channel របស់ PewDiePie មាន Subscriber ប្រមាណ ៦៧ ៣៧២ ៧៩៨ នាក់ ធៀបនឹង T-Series កើនឡើងដល់ ៦៧ ៣៧៨ ៣១៤ ពោលគឺមានភាពខុសគ្នាខ្ទង់ ៦ ពាន់នាក់។
តាមស្ថិតិគិតចាប់តាំងពីដើមឆ្នាំ ២០១៨ គណនី PewDiePie ជាអ្នកបង្កើតមាតិកាមានឈ្មោះពិត Felix Kjellberg សញ្ជាតិស៊ុយអែតមានតួលេខអ្នកគាំទ្រកើនឡើងត្រឹម ១៥ ភាគរយ រហូតធ្វើឲ្យមាតិកាបង្កើតឡើងដោយ T-Series ឆ្មក់យកជាប់ឈ្មោះជា Channel ទទួលបានការចុច View ច្រើនជាងគេបំផុតលើសពី ៥១,៥ ពាន់លានដង។ នេះបើយោងតាមរបាយការណ៍ Social Balde បានចុះផ្សាយ។
បើតាមប្រវត្តិនៃការចាប់ផ្តើម និយាយបានថា PewDiePie ចាប់ផ្តើមនាឆ្នាំ ២០១០ ដោយបង្ហោះចែកចាយនូវប្រភេទវីដេអូទាក់ទងនឹងការកម្សាន្ត និងវីដេអូហ្គេម ធៀបនឹង T-Series របស់ឥណ្ឌាប្រលូកក្នុងវិស័យតន្រ្តីតាំងតាំងពីឆ្នាំ ១៩៨៣ មុនទាំង YouTube លេចរូបរាងទៅទៀត ហើយជាញឹកញយគាប់ជួនកំណើនអ្នកប្រើប្រាស់អ៊ីនធឺណិតមានការកើនឡើងផងនោះ វីដេអូជាច្រើនរបស់ Channel ឥណ្ឌាមួយនេះក៏បានបង្ហោះចែកចាយជារៀងរាល់ថ្ងៃ។
រំឭកថាសម្រាប់លោក Kjellberg កាលពីឆ្នាំ ២០១៧ គ្រាមាន Subscriber ប្រមាណ ៥៣ លាននាក់ លោកមានទ្រព្យសម្បត្តិប្រមាណ ៦១ លានដុល្លារ ដោយត្រឹមតែមួយឆ្នាំនោះលោករកបាន ១៥ លានដុល្លារ ធៀបនឹងឆ្នាំ ២០១៣ ចំណូលនៅទាបបានតែជាង ៤ លានដុល្លារប៉ុណ្ណោះ៕
ប្រភព៖ Sabay
