កម្មវិធី “Korean Popular Culture and Arts Award” ជាពិធីដ៏អស្ចារ្យមួយដែលបានប្រារព្ធធ្វើឡើងដោយក្រសួងវប្បធម៌ កីឡា និងទេសចរណ៍ប្រចាំប្រទេសកូរ៉េ។
កាលពីថ្ងៃទី ២៤ ខែតុលា ឆ្នាំ២០១៨នេះ កម្មវិធីប្រគល់ពានរង្វាន់មួយត្រូវបានប្រារព្ធធ្វើឡើងនៅពហុកីឡដ្ឋាន Olympic Hall ក្នុងទីក្រុង Seoul។ ក្នុងកម្មវិធីនោះដែរ ក្រុមចម្រៀងប្រុសប្រចាំផលិតកម្ម Big Hit បានទទួលពានរង្វាន់ដ៏សំខាន់មួយ គឺពាន “Order of Cultural Merit” ដែលពានមួយនេះដែរ គឺប្រគល់ចំពោះអ្នកដែលដើរតួនាទីដ៏សំខាន់ក្នុងការធ្វើឲ្យវប្បធម៌ជាតិរបស់ខ្លួន កាន់តែមានការរីកចម្រើនទៅមុខ។
BTS ចាត់ទុកជាក្រុមចម្រៀងមួយ ដែលបានធ្វើឲ្យបទចម្រៀង K-pop និងភាសាកូរ៉េត្រូវបានរីកសាយ និងទទួលស្គាល់ពាសពេញពិភពលោក។ ពួកគេជាក្រុមចម្រៀងក្មេងដំបូងគេបង្អស់ ដែលមានកិត្តិយសទទួលបានពានរង្វាន់មួយនេះ៕
