ពិតណាស់ អ្នករស់នៅជាប់ដងផ្លូវ និងអ្នកធ្វើដំណើរ តែងត្អូរត្អែរ និងផ្ទុះកំហឹងយ៉ាងខ្លាំង ទៅនឹងពពួកម៉ូតូកែច្នៃបំពាក់បំពង់ស៊ីម៉ាំងបង្កការរំខានលាន់លឺកក្រើកដី ពីសំណាក់ក្រុមយុវជនជាកូនៗអ្នកមានមួយចំនួន មិនថានៅតាមបណ្តាខេត្ត និងរាជធានីភ្នំពេញ ។ ទោះយ៉ាងណា ដើម្បីឆ្លើយតបនឹងការត្អូញត្អែររបស់ពួកគាត់ សមត្ថកិច្ចយើងក៏បានចុះបង្ក្រាប និងឃាត់ពួកក្រុមប្រើប្រាស់ម៉ូតូលេងបំពង់ស៊ីម៉ាំងរំខានទាំងនោះ យកមកអប់រំដោយឲ្យអង្គុយស្តាប់បំពង់ស៊ីម៉ាំងប្រែនៗរបស់ពួកគេថាតើវាលឺលាន់រំខានប៉ុណ្ណាទៅ កាលពីពេលកន្លងមក ។
ជាក់ស្តែងៗ ថ្មីៗនេះ ក្មេងស្រីជំទង់ម្នាក់ ត្រូវបានប៉ូលីសដាក់ទណ្ឌកម្មឲ្យអង្គុយស្តាប់ឡើងស្ពឹកមុខតែម្តង បន្ទាប់ពីនាងត្រូវបានចាប់បានប្រើប្រាស់ម៉ូតូជាមួយបំពង់ស៊ីម៉ាំងរំខានគេឯង ។
យោងតាមគណនីហ្វេសបុកលោក ហុង វាស្នា បានបង្ហោះវីដេអូ និងសរសេរយ៉ាងដូច្នេះថា៖ «អភិបាលខេត្តកំពង់ឆ្នាំងបានបញ្ជាអោយកម្លាំងនគរបាលចរាចរណ៍ផ្លូវគោកចាត់វិធានការក្តៅលើអ្នកបើកបរហួសល្បឿនកំណត់ និងម៉ូតូកែរស៊ីម៉ាំងប្រ៉ែន គឺហៅគាត់អោយមកអង្គុយស្តាប់សំឡេងម៉ូតូគាត់នៅពេលគាត់បើករោទ៍តាមផ្លូវ ថាតើឮប៉ុនណា? ព្រោះប្រជាពលរដ្ឋជាច្រើននាក់បានសំណូមពរអោយជួយបញ្ឈប់សកម្មភាពពួកគេដែលបើករំខានជារៀងរាល់ថ្ងៃ» ។
ទោះយ៉ាងណា ករណីនេះត្រូវបានមនុស្សជាច្រើនដាក់បន្ទុកទៅលើជាងកែច្នៃជាចំបង និងឲ្យសមត្ថកិច្ចព្រមាន និងឈានដល់ការផាកពិន័យដល់ជាងៗកែច្នៃទាំងនោះ បញ្ឈប់ការកែច្នៃបំពង់ស៊ីម៉ាំងរំខាននេះដល់អតិថិជនរបស់ពួកគេទៀតទៅ វាចប់រឿងហើយ ៕
