គោព្រៃ​កម្ពុជា ប៉ះ​សិង្ហបុរី​ម៉ោង ៦៖៣០​នាទី​ល្ងាចនេះ នៅ​ស្តាត​អូឡាំពិក

(ភ្នំពេញ)៖​ ក្រុមបាល់ទាត់ជម្រើសជាតិកម្ពុជា នឹងត្រូវជួបតតាំងជាមួយក្រុមជម្រើសជាតិសិង្ហបុរី នាម៉ោង ៦៖៣០នាទីល្ងាចថ្ងៃទី១៦ ខែតុលានេះ ក្នុងជំនួបមិត្តភាពអន្ដរជាតិ ដើម្បីពង្រឹងសមត្ថភាពក្រុមសម្រាប់ត្រៀមក្នុងដំណើរឆ្ពោះទៅរកការប្រកួតពានរង្វាន់ AFF Suzuki Cup 2018 នាខែវិច្ឆិកាខាងមុខ។

នេះមិនមែនជាលើកទី១ ឡើយ ដែលក្រុមទាំងពីរបានជួបគ្នា។ ប៉ុន្ដែកម្ពុជា ធ្លាប់បានសាងប្រវត្តិសាស្ដ្រឈ្នះសិង្ហបុរីលើកដំបូង ក្នុងជំនួបមិត្តភាពអន្ដរជាតិ កាលពីឆ្នាំ២០១៦ ដោយបានយកឈ្នះក្នុងដី ២-១ ក្នុងរជ្ជកាលគ្រូបង្វឹកកូរ៉េលោក Lee Tae Hoon ដឹកនាំ។ ដូច្នេះចាំមើល ក្រោមការដឹកនាំរបស់អ្នកចាត់ការទូទៅថ្មីលោក Keisuke Honda និងគ្រូបង្វឹកលោក Felix តើល្ងាចនេះ ក្រុមគោព្រៃកម្ពុជា អាចបង្កើតកំណត់ត្រាឈ្នះសិង្ហបុរីម្ដងទៀត ឬយ៉ាងណា?

បើក្រឡេកទៅមើលលទ្ធផល ២ប្រកួតចុងក្រោយរបស់ក្រុមទាំងពីរ មុនជួបគ្នាល្ងាចនេះវិញ សម្រាប់ក្រុមសិង្ហបុរី គឺបានទទួលជ័យជម្នះទាំង ២ប្រកួត ពោលគឺបានយកឈ្នះក្រុមជម្រើសជាតិម៉ុងហ្គោលី ដោយលទ្ធផល ២-០ និងយកឈ្នះក្រុមជម្រើសជាតិ Fiji ដោយលទ្ធផល ២-០ ដូចគ្នា។ ផ្ទុយពីក្រុមជម្រើសជាតិកម្ពុជា ក្រោមការដឹកនាំរបស់អ្នកចាត់ការទូទៅ និងគ្រូបង្វឹកថ្មី គឺបានបញ្ចប់ដោយលទ្ធផលស្មើ ១ និងចាញ់ ១ ក្នុងនោះចាញ់ម៉ាឡេស៊ី ៣-១ និងស្មើទីម័រខាងកើត ២-២។

គួរដឹងថា នេះគឺជាជំនួបមិត្តភាពអន្ដរជាតិផ្លូវការលើកទី៣ របស់ក្រុមគោព្រៃកម្ពុជា ដែលសហព័ន្ធកីឡាបាល់ទាត់កម្ពុជា បានប្រកាសរៀបចំ ដើម្បីត្រៀមពានរង្វាន់ AFF Suzuki Cup 2018 ដោយកម្ពុជា ស្ថិតក្នុងពូលA ជាមួយវៀតណាម ម៉ាឡេស៊ី មីយ៉ាន់ម៉ា និងឡាវ។ រីឯក្រុមសិង្ហបុរី ក៏ត្រៀមចូលរួមព្រឹត្តិការណ៍ប្រចាំតំបន់នេះដែរ ដោយស្ថិតក្នុងពូលB ជាមួយថៃ ហ្វីលីពីន ឥណ្ឌូនេស៊ី និងទីម័រខាងកើត។ ចំពោះតម្លៃសំបុត្រចូលរួមទស្សនាការប្រកួតល្ងាចនេះ គឺរក្សាតម្លៃនៅដដែល គឺមានតម្លៃ ១ម៉ឺនរៀល និងតម្លៃ ៥ពាន់រៀល៕

ហាមដាច់ខាតការយកអត្ថបទពីវេបសេយ www.baykdang.com ដោយគ្មានការអនុញ្ញាតិ។ បើលោកអ្នក ត្រូវការអត្ថបទ សូម inbox ទៅហ្វេសប៊ុកផេច [email protected]

ព័ត៌មានទាក់ទង៖

  • ព័ត៌មានថ្មីៗ