(ភ្នំពេញ)៖ កីឡាករស្នូលរបស់ក្រុមជម្រើសជាតិសិង្ហបុរី Safuwan Baharudin បានលើកឡើងថា ជំនួបមិត្តភាពអន្ដរជាតិ ជាមួយក្រុមម្ចាស់ផ្ទះកម្ពុជាល្ងាចនេះ គឺជាការប្រកួតដ៏ពិសេសមួយ ហើយក៏មិនអាចទស្សទាយលទ្ធផលទុកមុនបានដែរ ដោយសារក្រុមទាំងពីរ សុទ្ធតែត្រៀមខ្លួនបានល្អដូចគ្នា ។ តែក្នុងនោះ Safuwan បានចាប់អារម្មណ៍កីឡាករម្នាក់របស់កម្ពុជា គឺ ចាន់ វឌ្ឍនាកា ដែលអាចបង្កគ្រោះថ្នាក់ដល់ក្រុមខ្លួន ប្រសិនបើមានការធ្វេសប្រហែសចំពោះរូបគេ ។

សមាជិកក្លឹប Pahang នៃលីគកំពូលម៉ាឡេស៊ីរូបនេះ បាននិយាយថា «ខ្ញុំធ្លាប់លេងរយៈពេល ៦ខែជាមួយ វឌ្ឍនាកា កាលនៅ Pahang ចឹងខ្ញុំដឹងពីគុណសម្បត្តិរបស់គាត់ វឌ្ឍនាកា គឺជាកីឡាករល្អ ហើយមានគុណភាព ។ គេអាចកែប្រែស្ថានការណ៍ប្រកួតបាន បើសិនការប្រកួតមិនមានអ្វីប្លែក ។ ផ្អែកលើបទពិសោធន៍ ធ្លាប់លេងរួមក្លឹប និងពាន Suzuki Cup យើងមិនអាចធ្វេសប្រហែស វឌ្ឍនាកា បានទេ ព្រោះគេអាចបង្កគ្រោះថ្នាក់ដល់ក្រុមយើង ។ តែយ៉ាងណាយើងមិនផ្ដោតតែលើ វឌ្ឍនាកា ទេ គឺផ្ដោតលើក្រុមទាំងមូលតែម្ដង» ។

សូមរំឭកថា Safuwan និង ចាន់ វឌ្ឍនាកា គឺជាអតីតមិត្តរួមក្រុមនឹងគ្នា កាលពីលេងនៅ Pahang តែសោកស្ដាយ វឌ្ឍនាកា ត្រូវបានក្លឹបលីគកំពូលម៉ាឡេស៊ីនេះបញ្ចប់កុងត្រាមុនកាលកំណត់ ស្របពេលកីឡាករជម្រើសជាតិសិង្ហបុរី នៅជាសមាជិក Pahang នៅឡើយ ។ យ៉ាងណាមិញ កីឡាករ Safuwan បានប្ដេជ្ញាចិត្តនឹងធ្វើឲ្យបានល្អបំផុត ដើម្បីទទួលបានលទ្ធផលល្អ ក្នុងជំនួបមិត្តភាពអន្ដរជាតិ ជាមួយក្រុមជម្រើសជាតិកម្ពុជា នាវេលាម៉ោង ៦៖៣០នាទីល្ងាចនេះ នៅលើទីលានពហុកីឡដ្ឋានជាតិ រាជធានីភ្នំពេញ៕